czwartek, 31 stycznia 2013

De secreto motūs birotae

Iam ducentos annos birotā utimur, postquam scilicet annis 1813-1817 Karl Freiherr Drais von Sauerbronn struxit prototypum hodiernae formae birotarum, licet primus omnium ideam birotae in charta iam exeunte saeculo decimo quinto delineavisset Leonardius da Vinci. Studiosi nihilominus nondum bene sciunt cur... birota moveatur, id est cur non in laevam aut dextram prolabatur.
Diu motus birotae putabatur oriri effectu gyroscopico, eodem scilicet effectu, qui cogit in uno loco "stare" turbinem a pueris pulsum. Sed ante quadraginta abhinc annos scientista Anglus ac simul birotarum avidus amator David Jones birotam struxit, quae effectum gyroscopicum omnino neglegeret at nihilominus vehebatur tali birota Jones sine ullo impedimento.
Nunc ergo secretum motus birotae physici suspicantur latere in parvis motibus lateralibus instrumenti moderandi, quo utentes efficimus ut birota se flectit de via recta sinistrorsus aut dextrorsus. Nam birotam gubernando – etiam cum directissimam viam sequi videamur – re vera continuo utimur parvissimis curvis alternis, tunc in dextram, deinde in sinistram, eo modo nescienter vim centrifugam adhibentes. Non satis id: etiam cum sine ullo usu manuum birotā vehimur, solo scilicet usu pedum pedalia pulsantium (quam summam "acrobaticam" artem gubernandi per tempus breve nonnulli interdum ostentare solent), birota quasi sua sponte tales supradictas parvissimas curvaturas facit, ne cadat ipsa in unum aut alterum latus. Sed etiam huius rei (i.e. parvos flexus esse causam birotae aequilibrii) nondum fiduciā centum centesimarum (100%) certi simus.
Talia docet diurnarius scientificus ephemeridis "Gazeta Wyborcza" Petrus Cieśliński.  

piątek, 25 stycznia 2013

De variis de Lutetia opinionibus

Caspar est filius incredibilis (decem annos natus) Tymonis et Lesbiae, qui se gerit quasi centenarius omnem de conditione humana scientiam possidens, qui scilicet omnia in vita sua et dulcia et acerba expertus sit. Ita, cum (tunc octo annorum puer) in itinere Gallico primum turrim Eiffelianam conspexisset, patrem matremque rogavit:
- Num haec est vero turris Eiffeliana?
- Ita, mi fili.
- Hem, non tam splenida ut vulgo dicitur.
Sed similiter inopinatam de Lutetia Parisiorum opinionem audivi peregrinatoris cuiusdam Formosani (civis scilicet insulae Taiwan), qui, me hanc urbem laudare audiens, dixit:
- Lutetia? Res mala: incolae nimis cito ambulant. (Anglice: Paris? Not good. People walk too fast.)

Dialecti avium canentium

In quodam loco legi ornithologos invenisse aves canoras per Europam viventes (sive hic nidificantes) suis propriis dialectis uti, id est aves eiusdem generis, exempli gratia: Coloeum monedulam, paulo aliter canere in Gallia, Germania Bohemiave. Quae res effectus sit... linguarum gentium in his terris habitantium, quarum sermones aves nescienter imitari conentur.

czwartek, 24 stycznia 2013

De inventoribus machinarum

Tymon, maritus Lesbiae, est diurnarius de rebus scientificis pro variis ephemeridibus scribens. Hic olim symbolam divulgavit de quodam studioso Iaponico, qui sperabat se inventurum structurumque machinam... titillandi. Nullo enim modo homini contingit se ipsum digitis mulcendo ad titillationem adducere, necessaria semper est alterius hominis manus. At ebrius tunc oblitus sum finem narrationis: successeritne studiosus Iapo in opere suo an non?
His dictis, in memoriam venit alter inventor, Polonus, supradicto Iapone sine dubio cerritior, qui asseverabat se invenisse machinam per tempora retrorsum ambulandi. Tunc mihi munus apud agenturam Reuterianam Varsoviae fuit, quo uno fere quoque die, horis subvespertinis, telephonare solebat inventor noster rogans, ut de machina a se inventa scriberemus. Primum urbaniter cum eo agebamus, sed cum nimis molestus nobis factus sit, amica mea ei per telephonum dixit: "Rogo, domine care, telephones ad nos heri!"
Hoc a se audito, numquam denuo telephonavit.

Telae psychotropicis textae

Hans Peters et Peter Witt, zoologi universitatis studiorum Tubingensis, fuerant quinquagenariis annis praeteriti saeculi primi studiosi, qui araneas substantiis psychotropicis nutrirent. Ut cibum enim insectis retistructoribus praebere solebant strychninam, morphinam, dextroamphetaminam (qua substantiae psychotropicae vulgo nomine speed notae producuntur), mescalinam, diaethylamidum acidi lysergici (LSD), coffeinam, psilocybinam (est substantia, quae in fungis halucinogenis invenitur) necnon luminal (phenobarbitalum) ac postea, nam demum anno 1959 inventum est, etiam valium sive diazepamum. Experimenta haec conducta ab ambobus sunt ut mutationes notarentur in structura araneorum ab insectis substantiis psychotropicis sopitis textorum. Supradictorum duorum Germanorum opus pergit hodie diurnarius Helveticus Reto Schneider, qui nonnulla nova genera psychotropicorum diaetae aranearum addidit. Secundum quem: - foedissimas omnium ac maxime chaoticas telas texere araneas communi coffeina imbutas - cannabi sativa (Indica) sumpta, opera aranearum fieri pulcherrima - LSD autem producere retia simplicia, sed fere geometrice regularia. 
Ceterum repertum est araneas - qualicumque substantia adhibita - semper hora quarta matutina incipere opus suum texendi, ut facere solent quoque sine ullo usu psychotropicorum.

środa, 23 stycznia 2013

De homine nivali pittacio epistulari honorato

In Bhutania – regno illo Himalaico – usque annos sexagenarios vicesimi saeculi multi incolae homines feros nivales (Tibetice: yeti) exstare putabant, multique se in eos quondam in via incidisse affirmarent. Anno 1966 officium postale huius civitatis pittacium epistulare ediderunt, quod bestiam nivalem, quasi animal commune vivens, monstrabat. Nunc autem peregrinatores Bhutaniam petentes nuntiant minorem minoremque partem civium talia credere.
Num emortui facti sunt yeti spatio praeteritorum quinquaginta annorum?

De tristissimo die anni

Modo praeteritus dies Lunae tristissimus dies totius 2013 anni a nonnullis putatur. Ut citem fratrem Thomam Crean, sodalem Gregis Latine Loquentium, qui multo melius rem narravit quam ego umquam possem:
"Dies hodierna a nonnullis 'blue Monday' vocata est, id quod ad litteram 'dies lunae caerulea' significat, vel latinius, 'dies lunae animorum demissorum'. Quod insolitum nomen propterea accepit, quod tertia dies lunae in mense ianuario, gaudiis natalibus iamiam discessis, vernalibus nondum accessis, prae omnibus in anno dies censetur in qua homines lugubres videntur. Mihi tamen nix in plateis tectisque Legecestriae  nunc iacens et nitens speciem praebet laetissimam."

sobota, 19 stycznia 2013

De more Moscovitarum ursos domi tenere

In encyclopaedia Wikipediana de imperatrice Russiae Elisabetha Romanova (1709-1762) legens inveni et hunc nuntium: "Prohibuit illa incolis Moscoviae domi aut in palatiis ursos tenere, qui tempore diei catenati fremitus minaces in homines praetereuntes iactarent at noctu ipsi libere per vias urbis grassarentur".

piątek, 18 stycznia 2013

De theoremate chronologiae novae

De hypothesi temporis phantasmatici scribens omnino nescivi graviorem similem "haeresim" in Russia (et alibi) permanere, notam nomine theoriae chronologiae novae. Amica quaedam Russa me modo certiorem de hac cogitandi ratione fecit.
Chronologiam novam esse nomen theorematis a mathematico Russo Anatolio Fomenko annis 1973-80 inventi, qui nisus est similibus ideis Nicolai Morozov, Iohannis (Jean) Hardouin necnon (partim saltem) Isaaci Newton.
Secundum theorema Fomenkianum, historia humanae civilisationis multo iunior est quam discimus in schola necque aliquid certum dici potest de rebus veterioribus quam saeculum XI post Christum natum (si haec expressio omnino adhiberi hic potest, nam ipsius Christi mortem credit Fomenko evenisse anno – sc. traditionaliter computato - 1185). Putat quoque pyramides Aegyptias structas esse saeculis XI-XIX, testamentum vetus scriptum saeculo XVI nisi etiam serius, licet novi testamenti originem concedat fuisse priorem). Bellum Troianum et bella a militibus crucesignatis in Palaestina gesta putat re vera idem bellum fuisse, deinde incursus Mongolicos in Europam fuisse de facto invasionem Russorum (Cosaccorum). Insuper, non credit Fomenko methodum radiocarbonicam neque dendrochronologicam efficaces esse, nam producant errores a 600 usque 1.800 annorum.
Certe a plerisque studiosis theoria Fomenkiana censetur minime scientifica.

środa, 16 stycznia 2013

De hypothesi temporis phantomatici

Anno 1991 diurnarius Bavarianus nomine Heribert(us) Illig proposuit "theorema temporis phantomatici", secundum quod spatium annorum Domini 614-911 re vera numquam fiebat atque horum annorum computationem esse effectum aut erroris in calendario interpretando aut falsificationis actorum (documentorum) ad id tempus spectantium. Ad talem "revelationem" adduxit Illigem imprimis retardatio calendarii Iuliani calendario Gregoriano comparati. Nam, ut scimus, tempore solari sive astronomico tardius procedit calendarium Iulianum passu unius diei per quosque 128 annos; nihilominus, anno 1582, cum calendarium novum a papa Gregorio XIII propositum sit, additi sunt ei decem dies at non tredecim (ut fieri, secundum computationem Illigianam, deberet).
Inter alia argumenta pro sua thesi testantia numerat Illig paucitatem rerum ab archaeologis inventarum, quae ad tempus AD 614-911 spectarent necnon "irregularitates", quae evenirent in applicando ad eodem spatium temporis methodum radiometricam ac dendrochronologicam.
Deinde putat personam Caroli Magni (necnon totam historiam dynastiae Carolingorum) esse mystificationem consulto in libros historicos introductam iussu caesaris Ottonis III et papae Sylvestri II.

poniedziałek, 14 stycznia 2013

De Slovaquia adhuc in statu belli US-Americanis denuntiati manente

Eadem fere ratione ut in casu Liberae Urbis Gedani, anno 1945 nihil constitutum est de futuro statu duarum terrarum sociarum Hitleris: Slovaquiae et Croatiae, nam ambo exsistere cessaverunt una cum interitu Germaniae Hitlerianae (Slovaquia facta est pars Bohemoslaviae, Croatia autem Iugoslaviae – quarum terrarum partes, seu potius res publicae autonomae, ambae fuerant tempore inter duo bella mundana). Nemo tunc (anno scilicet 1945) praevidere potuerit ambas sui iuris statum recuperaturas, quod contra praevalentem opinionem evenit annis 1991 (Croatia) et 1993 (Slovaquia). Ambae terrae renatae statim declaraverunt se nulla responsabilitate teneri pro actis ambarum civitatum Hitlerianarum, multi tamen iuris internationalis periti aliter de hac re sentiunt. Si hi recte putant, Slovaquia... adhuc in statu belli est, quem anno 1941 indicavit USA, Britanniae necnon Unioni Sovieticae, dum Croatia – solis USA et Britanniae (nam regimen Croatiense numquam officialiter bellum Moscoviae denuntiavit, licet milites voluntarii Croati, ornatum militarem Germanorum induentes, huic bello participes essent).  

niedziela, 13 stycznia 2013

De Libera Urbe Gedano semper viva

Libera Urbs Gedanum (Polonice: Wolne Miasto Gdańsk, Theodisce: Freie Stadt Danzig) fuisse civitatem Pactu Versaliensi creatam, ut contentio inter Germanos (qui, secundum varias fontes, 85-97% cives huius civitatis essent) et modo renatam Poloniam (ad quam officialiter urbs Gedanum per multa saecula pertinebat) sedaretur.
Libera Urbs Gedanum de facto annis 1920-1939 exsistebat ac geographice continebat hodiernam urbem portuosam Gedanum necnon ei vicinam urbem minorem Sopot/Zoppot (ubi e.g. domus aleatoriae lege habebantur, dum in Polonia, et, ni fallor, in Germania tales domus teneri prohibebatur). Deinde, anno 1939, post invasionem Poloniae, ambo urbes vi in ditionem Germaniae redactae, anno autem 1945, post interitum Germaniae Hitlerianae, una cum magno tractu terrae adhuc Germanae (regionum scilicet Pomeraniae, Borussiae et Silesiae) a Polonis captae sunt.
Sed, ut patet, neque Postampii (Potsdam), ubi anno 1945 moderatores USA, Britanniae et Unionis Sovieticae de rebus futuris et victae Germaniae et aliis terris Europae orientalis pacti sunt, nec postea umquam status officialis Liberae Urbis Gedani disputabatur. Ita haec civitas Versaliae nata... de iure porro exstat, neque annexio a Germanis anno 1939 nec annexio a Polonis anno 1945 facta internationaliter umquam agnitae sunt. Nam, si putamus urbes Gedanum/Sopotem una cum aliis Germaniae orientalis partibus a Polonia anno 1945 iure sumptas esse, eodem factu quasi agnoscimus legalitatem annexionis Liberae Urbis Gedani a Germania Hitleriana anno 1939 factae! Si autem aliter putamus, quasi agnoscimus Liberam Urbem Gedanum porro exstare...
Ceterum, usque diem hodiernum exstare in Germania magistratus Liberae Urbis Gedaniae, sive Consilium Gedanorum, anno 1947 electum et anno 1951 probatum a suffragiis habitis in Germania (occidentali) inter profugos Gedanienses (quibus suffragiis participasse dicitur magna pars civium huius civitatis anni 1939, qui adhuc, anno scilicet 1951, vivi essent).

De nominibus agminum speculatorum

Cum amicis ruri diu ac copiose collocuti sumus – ego scilicet et Lesbia – de agminibus speculatoriis variarum gentium. In mentem venit revelatio: nos, sex collocutores, omnes plus minusve eadem nomina (aut potius acronyma) horum agminum scire. Quae sunt, praeter nomina agminum (hodiernorum et praeteritorum) nostrae patriae, (e memoria scribo):
- SIS, MI5 et MI6 Britannorum
- FBI et CIA Americanorum
- CzK, NKVD et KGB Sovietorum
- Abwehr, Gestapo, BND et Stasi Germanorum
- Kempeitai Iaponum
- StB Bohemorum
- DB Iugoslavorum
- Mossad Israelianorum
- ISI Pachistanorum
Mirum esse nos immo talia nomina scire, de Francogallicis e.g. Italisve nil audisse.

piątek, 11 stycznia 2013

Ferdinandus, non Franciscus

De domino Ossendowski (1876-1945) nuper scribens pro 'Ferdinando' usus sum nomine 'Franciscus'. Ignoscite, lectores cari! Ceterum vir erat re vera ingenio incredibili.

czwartek, 10 stycznia 2013

De 'smuts', daemone Livonorum parum noto

Smuts est nomen daemonis, de quo paucissimas res tantum scimus e scriptis ethnologorum XIX saeculi, qui tunc moribus opinionibusque rusticorum Livoniae (=hodierna Latvia) studebant. Smuts ita credebatur esse larva infantis puellae a sui matre occisae (imprimis in aqua demergendo, ut mos interdum ruri erat infantes contra voluntatem conceptos vita privare). Larvae tales deinde per mundum vivorum vagarentur per eundem numerum annorum, ut, si mortuae non essent, vixissent.
Smuts est certe daemon hominibus nocivus, ebrios exempli gratia post cenam (in caupona) domum noctu reposcentes per avia loca densasve silvas ducit, ne viam rectam invenire sciant. Aut, formam canis nigri adoptans, in tergum hominis prosilit ac se ferre iubet. Unde desilire omnino nolit nisi a portatore sui perterritus precatione lingua Latina facta.

De ideis salutariis in summa necessitate excogitatis (2)

Praedium animalium (Polonice: Hodowla zwierzątek, Anglice: Animal Husbandry) esse nomen lusus aleae, quem excogitavit anno 1943, tempore scilicet alterius belli mundani, mathematicus Polonus Carolus (Karol) Borsuk. Luditur in hoc lusu aleā duodecim laterum, quibus – loco numerorum – monstrantur iumenta (equi, vaccae) aliave animalia praedii (sues, oves, lepores). Accedit canis – animalium tutor contra hostes: lupum ac vulpem.
Ludunt duo, tres aut quattuor homines, quorum quisque praedium suum habet et conatur quam maximum numerum animalium utilium tenere atque ab incursibus luporum vulpiumque servare.
Sola ratio huius lusus aleae inveniendi erat necessitudo familiam domini Borsuk sustinere, nam ipse mathematicus officio salarioque privatus est postquam occupatores Germani Universitatem Varsoviensem anno 1939 clauserant. Quod huic familiae optime evenit: multi enim primum amici universitarii professoris Borsuk deinde alii homines ludum hunc adamaverunt ac multi aleas manu mathematici uxoris, Sophiae Borsuk, factas pictasque pecunia emerunt.
Ludus in tumultu finis belli in desuetudinem abiit, sed in annis nonagenariis vicesimi saeculi reintroductus est – nepotibus Borsuk consentientibus - a quadam domo editoria nomine Granna. Nunc, ut auditur, gratiam sibi alea haec animalis invenit etiam in aliis terris et adsunt ei versiones lingua Anglica, Germana atque Italica confectae.

środa, 9 stycznia 2013

De ideis salutariis in summa necessitate excogitatis (1)

Ineunte anno 1921 agmina Sovietica effugiens Franciscus Ossendowski – peregrinator, scriptor, diurnarius et speculator primum caesareae (tsaricae) Russiae, deinde regiminis Poloniae - pervenit in Uliastai, urbem occidentalis partis Mongoliae (in via autem magnam partem Sibiriae, Tibeti atque ambarum Mongoliarum, externalis scilicet et internalis, emensus est). Unde sperabat se porro per regiones Sinicas Iaponiam petere ut illinc, per maria nave vectus, Europam patriamque recuperaret.
Sed res pessime ei eveniebant, nam una ex parte a militibus Sovieticis Mongoliam invadentibus, ex altera anarchiā tumultuque in borealibus Sinarum provinciis regnantibus prohibitus est ex ube Uliastai in ullam directionem proficisci. Accedebat quod pecunia sibi – necnon sui collegae, quocum fugam e Russia ceperat – iam omnino fere deerat.
Rebus ita stantibus decrevit Franciscus ille laborem quendam suscipere ut pecuniam sibi compararet. Quid tamen faceret in medio tumultu bellorum? Consilium cepit... iter suum Sibiriacum, Tibetanum et Mongolicum describere et fabulam exaratam mittere divulgatum ad redactores nonnullarum ephemeridum, quae Sciamhaevi (Sinice: Shanghai) lingua Anglica- et Russica apparebant (Sciamhaevum erat tunc enim vera cosmopolis). Per decem epistulas missas unum tantum responsum accepit una cum viginti quinque yuan (nomen monetae Sinensium) salarii pro symbola divulgata.
Qua pecunia non longe potuerunt ambo collegae vitam sustinere. Decrevit ita Ossendowski se... dictionarium Sino-Anglicum (quod ca. quinque milia verborum contineret) scripturum, ad usum colonorum mercatorumque Sinensium, quorum sat magnus numerus in tribu Serica urbis Uliastai habitabat. Scripsit deinde opus tale dum amicus suus viginti quinque dictionarii exemplaria manu rescribendo exaravit. Hoc inceptum, praeter opinionem, haud parvam copiam pecuniae ambobus praebuit. Qua instructi, rebus in Sinis ad tempus paululum quietioribus, iter Iaponicum mox susciperunt.
Ceterum confecit quoque Ossendowski vocabularium Russico-Mongolicum necnon Russico-Soioticum (quae est lingua gentis nomadicae Soiotorum), nam linguarum erat peritissimus.